ဘန်ကောက်၊ သြဂုတ်
ထိုင်းဖွဲ့စည်းပုံအခြေခံဥပဒေခုံရုံးက Move Forward ပါတီကို ယနေ့ နေ့လည် ပိုင်းက ဖျက်သိမ်းလိုက်ပြီး ထိုင်းနိုင်ငံရေးသမား ပီတလင်ဂျာ နှင့် လက်ရှိပါတီခေါင်းဆောင် Chaithawat Tulathon အပါအဝင် ပါတီထိပ်တန်းတာဝန်ရှိသူများကို နိုင်ငံရေးလုပ်ခွင့် ၁၀ နှစ်ပိတ်ပင်လိုက်ကြောင်း ထိုင်းမီဒီယာများမှ တဆင့်သိရှိခဲ့ရသည်။
ပါတီဖျက်သိမ်းခံရတာနှင့်ပတ်သတ်ပြီး “ ဒါဟာ ထိုင်းနိုင်ငံအတွက် လူ့အခွင့်အရေး ကင်းမဲ့တဲ့ လုပ်ရပ်တစ်ခုလို ခံစားရတယ်။ ဒီလိုလုပ်တာဟာ ပထမဦးဆုံး အကြိမ်တော့ မဟုတ်ပါဘူး” လို့ ထိုင်းတက္ကသိုလ်ကျောင်းသားတစ်ဦးက News Ambassador သို့ပြောကြားခဲ့သည်။
ထိုင်းဘုရင်စနစ် ပြုပြင်ပြောင်းလဲရေး အဆိုပြုခဲ့သည့် အတွက် ထိုင်းခုံရုံးက ယခုကဲ့သို့ ပိတ်ခဲ့ရာ ထိုင်းဘုရင်စနစ်နှင့် ပတ်သတ်ပြီး
“ ဒီဥပဒေကြောင့် ဘုရင်စနစ်ကို ပြည်သူတွေက ပိုမမုန်းမိအောင် ပြုပြင်ပြောင်းလဲသင့်တယ် ” လို့ ၎င်းကဆိုသည်။
Move Forward ပါတီသည် ပြီးခဲ့သည့်ရွေးကောက်ပွဲအတွင်း ထိုင်းလူထုအကြားရေပန်းအစားဆုံးနှင့် အမတ်နေရာအများအနိုင်ရသည့် ပါတီဖြစ်ပြီး မြန်မာပြုပြင်ပြောင်းလဲရေးကို ကူညီပေးမည်ဟု ပြောထားသောပါတီလည်းဖြစ်သည်။
ထိုသို့ ဖျက်သိမ်းခံရမှုနှင့်ပတ်သတ်ပြီး “ ထိုင်းနိုင်ငံမှာလည်း နိုင်ငံရေးပြဿနာတွေရှိတယ်ဆိုတာ သိစေချင်တယ်။ စစ်မှန်တဲ့ ဒီမိုကရေစီရဖို့ ဆယ်စုနှစ်ပေါင်းများစွာ တိုက်ပွဲဝင်ခဲ့ပြီး မြန်မာပြည်သူတွေအားလုံး ဆက်လက်တိုက်ပွဲဝင်ကြဖို့ တိုက်တွန်းချင်ပါတယ်။ ” လို့ Move Forward Party အားပေးသူ တစ်ဦးကပြောကြားသွားပါသည်။
Photo – Move Forward Party