စဉ့်ကူးနယ် လက်ပံလှရွာ ဈေးတန်းကို စစ်ကောင်စီ လေကြောင်းဖြင့် ဗုံးကြဲသဖြင့် ၁၁ ဉီး သေဆုံး

စဉ့်ကူး၊ မတ် ၁၄

ယနေ့မွန်းလွဲပိုင်းက မန္တလေးတိုင်း စဉ့်ကူးမြို့နယ် လက်ပံလှကျေးရွာရှိ ဈေးတန်းကို စစ်ကောင်စီက လေကြောင်းဖြင့် ဗုံးကြဲတိုက်ခိုက်ခဲ့ရာ ပြည်သူ ၁၁ ဉီး သေဆုံးခဲ့သည်ဟု မန္တလေး PDF က သတင်းထုတ်ပြန်လာသည်။

ယနေ့  မတ်လ ၁၄ ရက်နေ့ မွန်းလွဲ ၃ နာရီခန့်က အာဏာသိမ်းစစ်ကောင်စီတပ်သည်  လက်ပံလှကျေးရွာရှိ လူစည်ကားရာ စျေးဆိုင်တန်းများအား အကြောင်းမဲ့ လေကြောင်းတိုက်ခိုက်မှု ပြုလုပ်ခဲ့သည်ဟု ထုတ်ပြန်ချက်တွင် ဖော်ပြထားသည်။

အဆိုပါ လေကြောင်းတိုက်ခိုက်မှုကြောင့် ကလေးငယ် ၂ ဦးအပါအဝင် ပြည်သူ ၁၁ ဦး အသက်ဆုံးရှုံးခဲ့ရပြီး ထိခိုက်ဒဏ်ရာရရှိသူ ၃၀ ဝန်းကျင် ရှိခဲ့ကြောင်း ဆိုထားသည်။

စစ်ကောင်စီသည် ပြီးခဲ့သည့်  မတ်လ ၄ ရက်နေ့ကလည်း စဉ့်ကူးမြို့နယ် ၊ လက်ပံလှကျေးရွာအား လေကြောင်းတိုက်ခိုက်မှုပြုလုပ်ခဲ့ရာ ပြည်သူ (၂)ဦး သေဆုံးခဲ့ကြောင်း သိရသည်။