ဘန်ကောက်၊ မတ် ၂၃
မြန်မာ အာဏာသိမ်းစစ်ခေါင်းဆောင် ဗိုလ်ချုပ်မှူးကြီး မင်းအောင်လှိုင်သည် ထိုင်းနိုင်ငံ ဘန်ကောက်မြို့တွင် ကျင်းပမည့် ၆ ကြိမ်မြောက် BIMSTEC (Bay of Bengal Initiative for Multi-Sectoral Technical and Economic Cooperation) ထိပ်သီးအစည်းအဝေးသို့ တက်ရောက်မည်ဖြစ်ကြောင်း ထိုင်းသတင်းဌာန Thai PBSက ဖော်ပြလာသည်။
အဆိုပါ အစည်းအဝေးအတွက် ဗိုလ်ချုပ်မှူးကြီးမင်းအောင်လှိုင်သည် လာမည့် ဧပြီ ၃ ရက်နေ့မှ ၄ ရက်နေ့အထိ ထိုင်းနိုင်ငံ ဘန်ကောက်မြို့သို့ လာရောက်မည်ဖြစ်ကြောင်း ၊ အဆိုပါ ခရီးစဉ်သည် အာဏာသိမ်းပြီး ၄ နှစ်ကျော်အတွင်း ထိုင်းနိုင်ငံသို့ ပထမဆုံး လာရောက်ခြင်းဖြစ်ကြောင်း ဆိုထားသည်။
အဆိုပါ အစည်းအဝေးတွင် ဆွေးနွေးမည့်အကြောင်းအရာများအတွက် အဆင့်မြင့်အရာရှိများက ကြိုတင်ပြင်ဆင်နေကြောင်း၊ ပထမဆုံး ထိပ်သီးအစည်းအဝေးကို ထိုင်းဝန်ကြီးချုပ် ပေထုန်တန်က သဘာပတိအဖြစ် ဆောင်ရွက်ကာ BIMSTEC အဖွဲ့ဝင်နိုင်ငံများအားလုံး၏ ထိပ်သီးခေါင်းဆောင်များ တက်ရောက်မည်ဖြစ်ကြောင်း ဖော်ပြထားသည်။
BIMSTEC အဖွဲ့ကို ပြီးခဲ့သည့် ၁၉၉၇ ခုနှစ်ကတည်းက တည်ထောင်ခဲ့ခြင်းဖြစ်ပြီး ဘင်္ဂလားပင်လယ်အော်နှင့် နယ်နိမိတ်ချင်းထိစပ်နေသော နိုင်ငံများအကြားတွင် စီးပွားရေးပူးပေါင်းဆောင်ရွက်ရန်၊ တောင်အာရှနှင့် အရှေ့တောင်အာရှအကြား စီးပွားရေး၊ လူမှုရေးနှင့် ယဉ်ကျေးမှုဆိုင်ရာ ဆက်ဆံမှုများကို မြှင့်တင်ရန် ရည်ရွယ်ဖွဲ့စည်းခဲ့ခြင်းဖြစ်သည်။