အင်းတော်၊ မတ် ၂၁
စစ်ကိုင်းတိုင်း၊ အင်းတော်မြို့နယ်တွင် စစ်ကောင်စီစစ်ကြောင်း ကြားဖြတ်တိုက်ခိုက်ခံရပြီး အသေအပျောက်များခဲ့ကြောင်း သိရသည်။
ပြီးခဲ့သည့် မတ်လ ၁၅ ရက်နေ့က စစ်ကိုင်းတိုင်း၊ ကသာခရိုင်၊ အင်းတော်မြို့နယ်အစပ် ကသာမြို့နယ်၊ ပင်လွတ်ရွာအနီး ပန်းတောင်ကြီး၊ ပန်းတောင်လေးတောင်၌ ကသာမြို့ ခမရ-၃၀၉ မှ ထွက်လာသော စစ်ကောင်စီစစ်ကြောင်းကို တော်လှန်ရေးတပ်များက ကြားဖြတ်တိုက်ခိုက်ခဲ့ခြင်းဖြစ်ကြောင်း အမှတ် ၁ စစ်ဒေသက သတင်းထုတ်ပြန်လာသည်။
စစ်ကောင်စီ ဗိုလ်မှူး လင်းထက် ဦးစီးပြီး ခမရ (၁၀၆၊ ၃၀၉)၊ ခလရ-၆ ပူးပေါင်းအင်အား (၁၅၀) ခန့်ပါသော ၎င်းစစ်ကြောင်းကို EAOs(KIA)၊ KPDF၊ ကသာခရိုင် တပ်ရင်း-၁၊ မိုးတားတိုက်နယ် ပကဖ နှင့် ကသာမြို့နယ် ပကဖ ပူးပေါင်းအဖွဲ့တို့မှ တိုက်ခိုက်ခဲ့ခြင်း ဖြစ်ကြောင်း ထုတ်ပြန်ချက်အရ သိရသည်။
တိုက်ခိုက်မှုတွင် စစ်ကောင်စီဘက်မှ (၃၃) ဦး သေဆုံးပြီး (၃၁) ဦးကို ဖမ်းဆီးရမိကာ လက်နက် (၅၄) လက် သိမ်းဆည်းရမိခဲ့ကြောင်း စစ်ဒေသ ၁ က ဆိုသည်။
သိမ်းဆည်းရမိသော လက်နက်ခဲယမ်းများမှာ MA-1 သေနတ် (၂၉) လက်၊ MA-2 (၆) လက်၊ MA-3 (၁၂) လက်၊ MA-4 (၃) လက်၊ MA-11 (၁) လက်၊ MA-15 (၁) လက်၊ Anti Drone Gun (၁) လက်၊ MA-10 ဗုံးသီး (၃၇) လုံး၊ MA ကျည် (၈၀၀၀) တောင့်၊ MA-15 ကျည် (၂၀၀၀) တောင့်၊ ၆၀ မမ ဗုံးသီး (၁၇) လုံး၊ ကျည်အိမ် (၁၁၃) ခု၊ ကျောပိုး Jammer (၁) ခု၊ ဆက်သွယ်ရေးစက် (၁) လုံး၊ အထိုင်ဖုန်း (၁) လုံး၊ ကျည်ကာဦးထုပ် (၁၂) လုံး တို့ဖြစ်ကြောင်း သိရသည်။
အလားတူ တော်လှန်ရေးရဲဘော် ၂ ဦးလည်း တိုက်ပွဲအတွင်း ကျဆုံးခဲ့ကြောင်း သိရသည်။