ရေစကြို၊ မတ် ၁၉
မကွေးတိုင်း ရေစကြိုမြို့နယ် ရေလယ်ကျွမ်းဒေသကို အာဏာသိမ်းစစ်တပ်က ယခုတစ်ခေါက် စစ်ကြောင်းထိုးနေသည့် ၁၄ ရက်အတွင်း ပြည်သူ ၁၇ ဉီးနှင့် PDF ၁ ဉီး အသတ်ခံခဲ့ရကြောင်း သိရသည်။
မတ်လ ၂ ရက်နေ့တွင် ပခုက္ကူအခြေစိုက် စစ်ကောင်စီ၏ တပ်မ ၁၀၁ လက်အောက်ခံ တပ်ဖွဲ့ဝင်များက ဧရာဝတီမြစ်ကြောင်းမှတဆင့် ရေတပ်အကူအညီဖြင့် ရေလယ်ကျွန်းသို့ဝင်ရောက်ခဲ့ပြီး မြင်းခြံမြို့ရှိ ပျူစောထီးများနှင့် စစ်ကောင်စီတပ်က ဆီမီးခုံဆိပ်ကမ်းတွင် ပူးပေါင်းကာ ရေစကြိုအခြေစိုက် ခမရ ၂၅၆၊ ၂၅၇၊ ၂၅၈ တို့မှ တပ်ဖွဲ့ဝင်များနှင့်ပူးပေါင်း၍ စုစုအောင်း အင်အား ၂၀၀ ကျော်ဖြင့် စစ်ကြောင်းထိုးခဲ့ခြင်း ဖြစ်ကြောင်း သိရသည်။
မတ် ၂ ရက်နေ့ကတည်းက ဝင်ရောက်စစ်ကြောင်းထိုးခဲ့သည့် အဆိုပါ စစ်ကောင်စီတပ်၏ လက်ချက်ကြောင့် မတ်လ ၁၆ ရက်နေ့အထိ အသတ်ခံရသည့် ပြည်သူ ၁၇ ဉီးနှင့် PDF ၁ ဉီးတို့ရှိပြီဖြစ်ကြောင်း ပြည်သူ့ကာကွယ်ရေးတပ်များ၏ မဟာဗျူဟာလေ့လာရေး မှတ်တမ်းဌာနခွဲမှ ပြုစုထားသော စာရင်းများအရ သိရသည်။
စစ်ကြောင်းစထိုးသည့် မတ် ၂ ရက်နေ့က မြေစွန်းတော်ရွာအဝင်တွင် တော်လှန်ရေးတပ်ဖွဲ့အချို့က ခုခံတိုက်ခိုက်ကြရာ တော်လှန်ရေးရဲဘော် ၁ ဉီး ကျည်ထိမှန်ဒဏ်ရာဖြင့် ဖမ်းဆီးခံရပြီး မတ် ၁၄ ရက်နေ့တွင် ခေါင်း-ဖြတ်-မီး-ရှို့ သတ်ဖြတ်ခံရကြောင်း၊ ရဲဘော်၏ ရုပ်အလောင်းကို မတ် ၁၆ ရက်နေ့တွင် ဒေသခံများက ပြန်လည်တွေ့ရှိခဲ့ရကြောင်း သိရသည်။
ယင်းနေ့မှာ မတ် ၄ ရက်နေ့အထိ မြေစွန်းတော်ရွာရှိ နေအိမ် ၂၆၆ လုံး၊ မတ် ၅ ရက်နေ့တွင် ဇရပ်နီကျေးရွာမှ နေအိမ် ၆၈ လုံး၊ ယင်းနေ့ညနေပိုင်းတွင် သာဂေါင်လေးရွာမှ နေအိမ် ၂၀ ခန့်၊ မတ် ၁၂ ရက်နေ့တွင် ပန်းညိုရွာမှ နေအိမ် ၅၀ ကျော်၊ မီးရှို့ဖျက်ဆီးခံခဲ့ရကြောင်း မှတ်တမ်းများအရ သိရသည်။
သာဂေါင်ကျေရွာတွင်လည်း မပြေးနိုင်သည့် အရပ်သားသက်ကြီးရွယ်အို ၂ ဉီး ခေါင်း-ဖြတ်- အသတ်ခံခဲ့ရကြောင်း သိရသည်။ မတ် ၁၆ ရက်နေ့အထိ ၂ ပတ်တာအချိန်အတွင်း ရေလယ်ကျွန်းဒေသမှ ပြည်သူ ၁၇ ဉီး အသတ်ခံခဲ့ရကြောင်း ပြည်သူ့ကာကွယ်ရေးတပ်များ၏ မဟာဗျူဟာလေ့လာရေး မှတ်တမ်းဌာနခွဲမှ ပြုစုထားသော စာရင်းများအရ သိရသည်။
ယမန်နေ့ မတ် ၁၈ ရက်နေ့က ဘိစပ်ကုန်းရွာကို စစ်ကောင်စီတပ်က ဝင်ရောက်မီးရှို့ခဲ့ပြီး ယနေ့ မတ် ၁၉ ရက်နေ့မနက်တွင် ငတရော်ရွာကို မီးရှို့ဖျက်ဆီးခဲ့ကြောင်း သိရသည်။
လက်ရှိတွင် စစ်ကောင်စီစစ်ကြောင်းကြောင့် မြေတော်၊ ကိုင်း၊ ဘိစပ်ကုန်း၊ ဆည်သစ်မြင်၊ မြေစွန်း၊ ညောင်မွေးပင်၊ နေရင်း၊ ပေါက်တော၊ ပေါက်အူ စသည့် ကျေးရွာတို့မှ ဒေသခံ သောင်းနှင့်ချီ၍ ထွက်ပြေးတိမ်းရှောင်နေကြရကြောင်း သိရသည်။
