စစ်ကိုင်း၊ မတ် ၂၈
News Ambassador
ယနေ့ နေ့လည် ၁၂ နာရီ မိနစ် ၅၀ ခန့်က မြန်မာနိုင်ငံ၊ စစ်ကိုင်းတိုင်း၊ စစ်ကိုင်းမြို့အနီး ဗဟိုပြုပြီး လှုပ်ခတ်သွားသည့် ငလျင်ကြောင့် နှစ်ပေါင်း တစ်ရာကျော် သက်တမ်းရှိပြီဖြစ်သည့် စစ်ကိုင်းတံတား ကျိုးကျသွားခဲ့ကြောင်း သိရသည်။
ကနဉီးသတင်းများအရ အင်အား ၇ ကျော်သည့် အဆိုပါ ငလျင်ကြောင့် အင်္ဂလိပ်ခေတ် ၁၉၃၄ ခုနှစ်တွင် တည်ဆောက်ထားခဲ့သော စစ်ကိုင်းတံတား(ဟောင်း) ကျိုးကျပျက်စီးသွားခဲ့ကြောင်း ဒေသခံထံမှ သိရသည်။
“အသစ်ဆောက်ထားတဲ့ ရတနာပုံတံတား ကျိုးတာတော့မဟုတ်ဘူး။ တံတား အဟောင်း ကျိုးသွားတာ။ သူက နှစ် ၁၀၀ ကျော်လည်း ကြာပြီကိုး။ တံတားအဟောင်းက ရထားလမ်းပါတော့ မန္တလေး-မြစ်ကြီးနား ရထားပြေးဆွဲနေတုန်းက ရထားတွေက တံတားအဟောင်းကနေပဲဖြတ်တာ။ တံတားအသစ်က ရထားလမ်းမပါဘူး။ အခု တိုက်ပွဲတွေကြောင့် ရထားလမ်းပိတ်နေတော့ တံတားအဟောင်းက လူအသွားအလာနည်းတယ်လို့တော့ ပြောလို့ရတယ်။ ထိခိုက်သေဆုံးသူတွေ ရှိ မရှိတော့မသိရသေးဘူး” ဟု စစ်ကိုင်းဒေသခံ တစ်ဉီးက ပြောသည်။
မန္တလေး နန်းတွင်းရှိ ကျုံးမြို့ရိုးနှင့် နန်းဆောင်အချို့ ထိခိုက်ပြိုကျ ပျက်စီးသည်ဟုလည်း ဒေသခံထံမှ သိရသည်။
ယင်းအပြင် ငလျင်ကြောင့် မြန်မာနိုင်ငံအလယ်ပိုင်းဒေသအတွင်း ထိခိုက်ပျက်စီးမှုများပြားပြီး အသေးစိတ်အခြေအနေများကိုတော့ မသိရသေးပေ။
လက်တလောတွင် ထိခိုက်ပျက်စီး ဆုံးရှုံးမှုများ များပြားသည်ဟု ခန့်မှန်းထားကြသည်။
ယနေ့ နေ့လည် ငလျင်သည် ထိုင်းနိုင်ငံ၊ အိန္ဒိယ၊ လာအို၊ ဘင်္ဂလားဒေ့ရှ် ၊ တရုတ် နိုင်ငံများ သို့ပင် သက်ရောက်ခဲ့ပြီး ထိခိုက်ပျက်စီးမှုများ ရှိခဲ့ကြောင်း သိရသည်။
Photo- Local
