လှိုင်းဘွဲ့၊ မတ် ၂၆
ကရင်ပြည်နယ် လှိုင်းဘွဲ့မြို့နယ်အတွင်း နှစ်ပေါင်း ၃၀ ကျော် သက်တမ်းရှိပြီဖြစ်သည့် စစ်ကောင်စီတပ်အထိုင် ခလယ်ဒေးတပ်စခန်းကို ကရင်အမျိုးသား လွတ်မြောက်ရေးတပ်မတော် (K.N.L.A) တပ်မဟာ (၇) က တိုက်ခိုက်သိမ်းပိုက်လိုက်ကြောင်း KNU ဗဟိုက သတင်းထုတ်ပြန်လာသည်။
ခလယ်ဒေး စစ်ကောင်စီစခန်းကို မတ် ၂၂ ရက်နေ့တွင် ကရင်အမျိုးသား လွတ်မြောက်ရေးတပ်မတော် (K.N.L.A) တပ်မဟာ (၇) တပ်မဟာ လုံခြုံရေးစစ်ကြောင်း၊ တပ်ရင်း (၁၉)၊ တပ်ရင်း (၂၁)၊ တပ်ရင်း (၂၂) နှင့် တပ်ရင်း (၂၄) တို့က စတင်တိုက်ခိုက်ခဲ့ပြီး ၂၅ ရက်နေ့တွင် သိမ်းပိုက်နိုင်ခဲ့ခြင်းဖြစ်ကြောင်း ထုတ်ပြန်ချက်အရ သိရသည်။
ခလယ်ဒေး စစ်ကောင်စီတပ်စခန်းကို မတ် ၂၂ ရက်နေ့တွင် ဒရုန်းများဖြင့် စတင်တိုက်ခိုက်ခဲ့ပြီး စစ်ကောင်စီတပ်ဘက်မှလည်း မတ် ၂၄ ရက်နေ့တွင် ဂျက်ဖိုက်တာ ၂ စင်းဖြင့် ပေါင် (၅၀၀) ဗုံး (၄) လုံး၊ Y-12 ဖြင့် ဗုံး (၃၆) လုံး ခန့် ပြန်လည်ကြဲချ တိုက်ခိုက်ခဲ့ကြောင်း၊ မတ် ၂၅ ရက်နေ့တွင် စစ်ကောင်စီတပ်ဖွဲ့ဝင်များသည် ၎င်းတို့၏ လက်နက်ခဲယမ်းများကို မီးရှို့ဖျက်ဆီးကာ စခန်းစွန့်ခွာ ထွက်ပြေးသွားခဲ့ကြောင်း KNU ဗဟို၏ ထုတ်ပြန်ချက်အရ သိရသည်။
ခလယ်ဒေး စစ်ကောင်စီတပ်စခန်းသည် ၁၉၈၉ ခုနှစ် စက်တင်ဘာလ (၂၂) ရက်နေ့တွင် ထိုင်း−မြန်မာ နယ်စပ်ဒေသ ထိန်းချုပ်ရေး ရည်ရွယ်ချက်ဖြင့် တည်ဆောက်ခဲ့သော စခန်းတစ်ခုဖြစ်ပြီး နှစ်ပေါင်း ၃၆ နှစ်ခန့် သက်တမ်းရှိပြီဖြစ်ကြောင်း သိရသည်။
ခလယ်ဒေးစခန်းအား ရှင်းလင်းစဉ်အတွင်း စစ်ကောင်စီတပ်သား (၂) ဦး၏ အလောင်းကို တွေ့ရှိခဲ့ရပြီး စခန်းအတွင်းမှ ပွိုင့် (၅) တစ်လက်၊ ပွိုင့် (၅) ပြောင်း (၂) ချောင်း၊ ၆၀ မမ အရှည် (၁) လက်၊ ၆၀ မမ အတို (၁) လက်၊ RPG-7 (၁) လက်၊ MA-2 (၃) လက်၊ Jammer (၁) လုံး၊ မီးစက် အကြီး (၁) လုံး၊ မီးစက် အသေး (၁) လုံး၊ မိုင်းရှာစက် (၁) ခု၊ ရှေ့ထွက်မိုင်း (၆) လုံး၊ ၁၆ နင်းမိုင်း (၂) လုံး၊ ၆၀ မမ ကျည် (၂၇) လုံး၊ ခွေးဗုံး (၁၀) လုံး၊ ၈၁ မမ ကျည် (၂) လုံး၊ ၄၀ မမ ကျည် (၃၂) လုံး၊ RPG-7 ကျည် (၁၄) လုံး၊ ၇.၆၂ ကျည် (၂) သောင်း၊ ၅.၅၆ ကျည် (၈) ထောင်၊ တိုက်မိုင်း (၆၀) လုံး၊ ခမောက် (၈) လုံး၊ ဆိုလာ (၄) ချပ် တို့အား သိမ်းဆည်း ရမိခဲ့ကြောင်း ထုတ်ပြန်ထားသည်။
ပုံစာ − ခလယ်ဒေးစစ်ကောင်စီတပ်စခန်းမှ သိမ်းဆည်းရမိခဲ့သော လက်နက်ခဲယမ်းများ
